Eigedomslandmålar

<p><strong>Vil du vera med på å byggje eit nytt fagmiljø for kart, oppmåling og GIS i Sogn?</strong></p><p>Luster, Lærdal, Sogndal, Vik og Årdal etablerer frå 1. januar 2027 eit interkommunalt samarbeid om kart, oppmåling og GIS. Luster er vertskommune.</p><p>Me søkjer ein eigedomslandmålar til <strong>100 % mellombels stilling i to år</strong>. Stillinga kombinerer vikariat med prosjektoppgåver. Kontorstaden er rådhuset i Gaupne, medan arbeidsoppgåvene kan omfatta alle dei fem kommunane.</p><p>Stillinga skal særleg bidra til å ta att etterslepet av oppmålingssaker i Luster kommune og heve kvaliteten på opplysningane i matrikkelen. Samstundes vil du utføre oppgåver for dei andre samarbeidskommunane og bidra til å utvikle felles rutinar i det nye samarbeidet.</p><p>Du får ein variert arbeidskvardag med oppmålingsarbeid ute, sakshandsaming og kontakt med grunneigarar og kollegaer. Det nye samarbeidet får ni fagtilsette: tre innan kart og GIS, inkludert fagansvarleg, og seks innan oppmåling og matrikkel, inkludert fagansvarleg. I tillegg kjem einingsleiar. Du vert dermed del av eit større fagmiljø som skal lever tenester til alle dei fem kommunane.</p><p><strong>Arbeidsoppgåver</strong></p><ul><li>Planleggje og gjennomføre oppmålingsforretningar etter matrikkellova.</li><li>Sakshandsame eigedomssaker og føre opplysningar i matrikkelen, i samsvar med kompetanse og godkjenning.</li><li>Arbeide med kvalitetsheving i matrikkelen.</li><li>Rettleie grunneigarar, tiltakshavarar og andre brukarar.</li><li>Gje fagleg bistand til plan, byggjesak og andre kommunale fagområde.</li></ul><p>Den nærare fordelinga mellom løpande oppgåver og prosjektarbeid vert tilpassa kompetansen din og behova i samarbeidet. Det må påreknast reiseverksemd og feltarbeid i samarbeidskommunane.</p><p><strong>Kvalifikasjonar</strong></p><p>Me ønskjer primært ein autorisert eigedomslandmålar med relevant høgare utdanning. Søkjarar med relevant bachelor- eller mastergrad som er i gang med, eller ønskjer å kvalifisere seg for, autorisasjon, er også velkomne til å søkje. Om naudsynt ved tilsetjing vil me leggje til rette for rettleiing og mentoroppfølging i samband med autorisasjon.</p><p>Me ønskjer at du har:</p><ul><li>God kunnskap om eigedomsfag, tingsrett og matrikkellova.</li><li>Kjennskap til plan- og bygningslova og eigarseksjonslova.</li><li>Erfaring med oppmålingsforretningar og moderne oppmålingsutstyr.</li><li>Kompetanse innan GIS og bruk av geodata.</li><li>Godkjenning for matrikkelføring, eller føresetnad for å oppnå dette.</li><li>Gode norskkunnskapar, skriftleg og munnleg.</li><li>Førarkort klasse B.</li></ul><p>Erfaring frå kommunal forvaltning er ein fordel.</p><p><strong>Eigenskapar me legg vekt på</strong></p><ul><li>Du må kunne arbeide sjølvstendig og strukturert, og legge vekt på fagleg kvalitet. Du må kunne kommunisere godt med grunneigarar og andre partar, også når det er ulike syn på grenser og rettar.</li><li>Du må kunne samarbeide godt med andre, dele kunnskap og bidra til å utvikle eit felles fagmiljø.</li><li>Personlege eigenskapar vert tillagde vekt.</li></ul><p> <strong>Me kan tilby</strong></p><ul><li>Ei sentral fagrolle i eit nytt interkommunalt samarbeid.</li><li>Varierte oppgåver i fem kommunar med ulike eigedomstilhøve.</li><li>Eit tverrfagleg arbeidsmiljø med engasjerte kollegaer.</li><li>Moglegheiter for fagleg utvikling og relevant kompetanseheving.</li><li>Tilgang til tenestebil, oppmålingsutstyr og fagprogramvare.</li><li>Fleksitidsordning.</li><li>Løn etter avtale.</li><li>Kommunale tilsetjingsvilkår med gode pensjons- og forsikringsordningar.</li><li>Kontorstaden Gaupne ligg inst i Sognefjorden, om lag 25 minutt frå Sogndal. Her finn du gode kommunale tenester, eit variert næringsliv og kort veg til fjell, fjord og friluftsliv.</li></ul><p><strong>Andre opplysningar </strong></p><ul><li>Administrasjonsmålet i kommunen er nynorsk.</li><li>Alle faste nytilsetjingar vert gjort med ei prøvetid på 6 månader.</li><li>Me gjer merksam på at i følgje offentleglova § 25, 2. ledd kan opplysningar om søkjaren bli offentleggjort sjølv om du har oppmoda om ikkje å bli ført på offentleg søkjarliste. Dersom du har bedt om unntak frå offentleg søkjarliste vil du alltid bli varsla før søkjarlista vert offentleggjort.</li><li>Søknadar må leverast innan fristen og må sendast inn via rekrutteringssystemet vårt EasyCruit.</li></ul> <br /> Link til søknadsskjema: <a href="https://luster.easycruit.com/vacancy/application/3675981/223057?channel&#61;NavRest&amp;iso&#61;nn" rel="nofollow">Søk her</a>

Lignende stillinger